13059866_1200965653277132_219871656_n (1)

尋晚我係網絡上見到一個消息,話以色列又用白磷彈對付巴勒斯坦,咁呢個消息未經證實啦,但我知道二零零九年以軍的確有用白磷彈空襲過加沙,美國用過嚟對付伊拉克,而俄軍上年亦都使用過白磷彈嚟空襲伊斯蘭國。

咁…… 白磷彈到底係咩嚟呢?

白磷彈係一種好狠毒嘅武器! 化武嘅一種!

大家睇圖片係咪覺得好靚,靚到好似我地過年睇煙花咁呢? 而其實呢啲靚嘅嘢係好毒嘅!!

首先啦,白磷本身就係劇毒,致死量為五十毫克,不溶於水,非常易燃,遇到空氣就會自己燃燒,燒到無晒為止……

咁白磷彈嘅原理係點呢?

將一啲帶有黏稠物質嘅白磷燃燒劑裝係一個容器入面,而呢個容器會係炸彈中部位置﹔ 炸彈中間會有爆炸管,爆炸管部分會有用普通炸藥鑄成嘅葯柱﹔係葯柱嘅外圍厚厚地包上一層黃磷物質﹔之後再係炸彈四周裝鋁熱劑燃燒材料,引信通常在炸彈頭或尾部。 (我好似係度教人整炸彈?)

引信會引爆炸彈,燃燒劑會被炸到周圍飛, 而呢個時間燃燒劑上沾有白磷,白磷係常溫之下會自動燃燒,加上混合咗裝鋁熱劑燃燒材料,更加會引起劇烈嘅燃燒。 通常使用者會係飛機上面投放,受影響範圍大約會有六個足球埸咁大。

中咗招會點 ?

咁就大! 鑊! 了!!!!!

因為燃燒劑混合咗黏稠物質,所以可以黏付係人體、武器、建築物、動物…… 上面燃燒,而且白磷不溶於水,踫到物體會不停燃燒到成為灰燼為止,所以當呢樣嘢一接觸到人體,皮肉會燶會溶,會燒到入骨,會燒穿人體,同時產生嘅煙會對眼鼻刺激甚大,係一種危害性高嘅武器。

既然白磷彈咁滅絕人性,點解唔禁咗佢呢?

由於係空中投放白磷彈,受影響範圍會好大,因此好容易會傷及無辜,所以係一九八零年,《常規武器公約》第三條通過咗,內容係禁止對平民使用白磷作為燃燒武器,亦禁止對係平民居住區內嘅軍事進行白磷攻擊。

到現時世界上有八十個國家都簽咗呢項條約,但美國無簽到。

然後係一九八三年,美國簽咗《化學武器公約》,公約內容禁止使用任何「通過對生命產生化學作用而對人或動物造成死亡、傷害或暫時致殘”的“有毒化學」武器,但美國唔認同公約中嘅化武係包括白磷。

其實人類先係最毒,為咗利益造成太多生靈塗炭……

如果多一點同理心,諗吓如果受苦難嘅人係自己,係自己嘅親人,係自己嘅朋友, 應該會少好多慘劇,何況戰爭嘅時候裝備最少,最無能力保護自己嘅人會係平民百姓,呢啲人其實又無做錯啲咩,係唔應該遭受到呢種對待嘅。

最後多謝大家花咗幾分鐘睇呢篇應該無咩人有興趣嘅文章,多謝晒!

Related Post